“حب مات “ – جريدة مصر المنارة
ملابس أبو عمار
قراءة

“حب مات “

 

بقلم ربيعة المالكي
هو : قوليلي
بتسرحي في اللي فات ؟
هى : امممم …. يعني
ايوة بسرح فيه ساعات
كل كلمة وكل حرف
كل لحظة وكل ثانية
كل ترنيمة نايات
والليالي والكلام جوة السُكات
وحاجات ممزوجة بحاجات
عمري مانسيت اللي فات
كل حاجة واي حاجة

إمضتك ..
سيجارك وقهوتك ….
أدق ادق التفصيلات
أيام .. وشهور .. وسنين عدت
وكإنك كنت معايا من ساعات
مع كل دقة قلب
كله محفور في الذكريات

زمن ..
ولي وفات
حتى الكلام بينا
بقى مخنوق بالسُكات

هو : طب والحلم اللي كان ؟!!
هى : مش باقي منه غير رُفات

هو : وعن شريط الذكريات ؟؟ !!!!!

هى : فاكرة كل لحظة من اللحظات

طب قولي
فاكر انت .. ساعتها كنت بالنسبالي ايه ؟؟

كنت ليا كل حاجة
اللي جاي وكمان اللي فات
اما دلوقت انت عندي
صوت وصورة
شخصية من ضمن الشخصيات
بس الفرق اللي بينك وبينهم ..
إن بيني وبينك بعض من حب عزيز ومات
مجرد حاجة من الحاجات ..
بإيدك ..
تكون او لا تكون ..
تهوِّن عليا الليالي او تهون

هو : طب بتحلمي بيا ؟؟!!

هى : أيوة بحلم بيك ليلاتي
لحن قاسي لحن مُرّ
هو ينفع ؟!!!!
أبقى في حياتك ماضي مَرّ
وتبقى في حياتي حلم عُمرْ
تبقي حقيقتك مش معايا
وأبقي في حياتك مجرد سر ..
حاجة هشة مش قوية ..
طول عمري جبارة .. عنيدة وحقنية

منكرش انك أثرت فيا
لكن عمري ماهكون الضحية
ولّا مجرد ماضي .. عدى وفات
طيب …….
سيبلي ذكرى حلوة أتنفسها
لما تخنقني الازمات
بلاش تسيبلي
جرح غائر تفضحه الدمعات

انت بقى فاكر ؟؟؟
ولا بالنسبالك حب مات
والراديو الصغير والأغنيات ..
طب فاكر نجاة .. والأحاسيس والمشاعر
وفريد والآهات وأم كلثوم وفات الميعاد

هو : طب بتحنّي ؟؟
هى : أيوة بحنّلَك كل الأوقات..

الوسوم
ملابس أبو عمار

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق